Að sparka í kött - kímnigáfa?

Furðulegt fannst mér að lesa varnarræðu Ernu Einarsdóttur á mbl.is þar sem m.a. segir:

 ,,Maður nokkur birti síðan ummæli Ernu á facebooksíðu sinni og hvatti fólk til að deila þeim sem víðast í nafni dýraverndar. Sjálfur sagðist hann ætla að láta rannsaka málið. Ýmis meiðandi ummæli voru skrifuð um Ernu á facebooksíðu mannsins, hún var m.a. kölluð „helv. kerlingin“ og „viðbjóður“. Öllum þessum skrifum hefur nú verið eytt." (mbl.is)

 Umræddur maður er Árni Stefán Árnason, dýraréttarlögmaður sem starfar fyrir Kattavinafélag Íslands. Hann sendi Ernu ábendingu um að með þessari meðferð á dýrinu væri hún að brjóta dýraverndarlög. Að sjálfsögðu skrifaði hann undir nafni, en þeir sem eru að verja Ernu  kjósa að kalla hann bara ,,manninn". Skrif Árna Stefáns voru kurteislega orðuð eins og allt sem frá honum kemur. Hann segist ætla að láta rannsaka málið og þa er einmitt það sem ætti að gera. Við í stjórn Kattavinafélagi Íslands berum ábyrgð á því að ekki sé ráðist á málleysingjana sem geta ekki varið sig. Ég er mest hissa á að mbl.is skuli taka upp ,,varnarræðu" Ernu sem segir þetta hafa verið skrifað í gríni. Skrýtin kímnigáfa það. En það að rjúka bæði í viðtal á mbl.is og pressan.is og bera af sér sakir sýnir bara sekt hennar. Hvers vegna eyddi hún færslunni út af síðunni sinni ef þetta var bara grín??? Hafi einhverjir kosið að tjá sig á Facebook síðu Árna Stefáns er það á ábyrgð þess sem skrifar, ekki lögmannsins. 

Á Morgunblaðinu starfa margir sannir kattavinir og ég trúi ekki að neinn þeirra hafi tekið upp hanskann fyrir Ernu á mbl.is  Þetta eru skrýtin vinnubrögð og minnir mann á svokallaða ,,gúrkutíð" á blöðunum þegar ekkert var að gerast og blaðamenn þurftu að leita allra leiða til að skrifa um eitthvað. 

Ég hef starfað með Árna Stefáni frá því ég tók við starfi formanns Kattavinafélags Íslands í apríl í fyrra. Öll hans störf eru til fyrirmyndar og hann ber undir mig og/eða stjórn það sem hann hyggst skrifa og þá sem við viljum að kærðir séu fyrir dýraníð. Það að afsaka sig á netmiðlum réttlætir ekki framkomu Ernu gagnvart mállausu dýri og vert að kanna hvort ekki sé tilefni til sterkari áminningar eða kæru.Þá fyrst hefðu netmiðlarnir nú eitthvað til að skrifa um.